دائرةالمعارف شهر تبريز

www.tabrizinfo.com

 

 

 

 

 

 

      نام و نام خانوادگی:

حميد داديزاده تبريزی

      سال ومحل تولد:

1327 شمسی تبريز

      محل سکونت فعلی:

کانادا

      عرصه فعاليت:

زبانشاسی

      امکان ارتباط:

hamid.d@shaw.ca

 

 

 

 

 

.

بير آذربايجانلی ‌نين حيات فلسفه‌سی




حياتين يولو هر بير زامان دره تپه‌لی اولوب ، انيش يوققوشلی . بو حياتدان آماجيميز نه‌دير، بو يولون باشلانيشی سونو هاردادير؟ ميليونلار اينسان گلير بو حيات يولون گئدير. بيز دره تپه لری انيش يوققوشلاری آشيب داشيروخ و دونيا قافله سی اوز يولون دوام ائدير. من بو يولون هاراسيندايام؟ شبهه سيز بو يول،بو سفر باطيل دئير. و حقين يولون گئدنلر اوره گ دولوسو اميد وايناملا اوز يوللارينا دوام ائديللر.   
ايندی بير گوز آچيب بو يولا باخماق ايستيره‌م. بير افقلره تازادان گوز دولانديريرام، هاردان گليب هارا اوغرورام، کيمم، بو دونيانی هانسی پنجره دن گوروره‌م، گلين سيز ده بو يولدا مندن يولداش اولون.
من کيمم؟ ايسته‌کيم نه‌دير؟ بو حياتدان مقصديم نه‌دير؟ شاعير دئميشکن بو يالان دونيادان آماجيم نه‌دير. هر زامان بو سورويه دوشونوره‌م کی اينسان حيات باغچاسيندا نه آختارير، نه اکير نه بيچير. بو فيزيک دونياسيندا حققين حقيقتين گوللرينی نه جور سوارير؟ بو اينساندير کی حق و حقيقت، اونلا گول آچير اونلا سونور. بو اينساندير هم درينليقلارا جومور، حياتين باغچاسين حقيقتله، فضيلتله بزه‌ير، همان اينسان بير زاماندا بير يرتيجی حيوان کيمی اولور. بو سورقو سورويه هر بير اينسان زامان زامان راستلاشير. من بو جور دوشونوره‌م کی اينسانی اينسان ائدن اونون دوشونجه‌لری و ايناملاری ‌دير. اينسانين کيمليکی اونون دوشونجه‌لرينده‌ن، اونون کوکونده‌ن آسيلی ‌دير. اينسان اوز کوکو اوسته دايانير، دورور، و او کوکوايله دونيای ‌نان ايلگيله‌نير. دونيانين هر بير ئولکه‌سينده اولسان، هر بير يئرده وطنداش اولورساندا، آنجاق او کوکوند‌ه‌ن آسيليسان. کوکسيز بير اينسان ريشه سيز بير آغاجا بنزه‌ر. اينسانين کوکو ان اول اونون دوغما تورپاقی و اونون آنا ديليدير. بو کوک وريشه اينسانی هارمونيک ياشايشا چاغيرير. بو هارمونيک يا خود وحدت دونياسيندا، يالنيز صولحون سسی سسله‌نير ، اينسانه حورمت ايسته‌لينير. بو تعريفد‌ه‌ن سونرا من اوز کوکومد‌ه‌ن سوز اچماق ايستيور‌ه‌م.
من کيمم؟ من بير اينسانام، ميليونلار اينسان کيمی ، منيمده بو يئر کوره‌سينده آتا بابام وار، دوغما ائليم گئچميشيم وار، بير گوبه لک کيمی يئردن چيخماميشام منيمده اصل نسبيم واردير. من بير اينسانام، دانيشماغا ديليم، يازماغا اليم و دوشونماغا بئينيم وار. آنادان اولان يئريم تبريز شهريدير، او قديم اسکی شهير که تاريخده، عاليملره گوره بير زامان يئر اوزونون بهشتی آدلانيردی ، دوغرودور، تبريز،اهراب محله‌سی ، مول لا علی اکبر کوچه‌سی ،آنامدا تبريزلی اولوب، ذيقلار محله‌سيندن. آتا بابالاريمدا تبريزليدير. چشمه باشيندان، تبريزين محله چشمه لرينين بويوک بير تاريخی وار. چشمه باشی ، بير زامان منيم شهريمده چشمه باشلاريندا قيزلار اوغلانلار گوروش ائده ردی . چشمه باشی گوروشله ر يئری حساب اولاردی . شهرين حياتی بو چشمه لره باغليی ‌دی . هله چشمه باشی ، او محله چشمه نين درين پيلله لری ، سرين دالانلاری و قورخولو آتمسفری ياديمدادير.
من بير اينسانام، منيم ديليم شيرين غنی تورک ديللرينين عائله سيند‌ندير. آنا قارنيندان ، او زئرزميده، حوزه‌ک باشيندا گوز دونيايه آچاندان ، ديليم تورک ديلی اولوبدور، بو ديل بير باشی بلالی بير ديلدير. ايران تورپاقلاريندا منيم ديليم مظلوم قالميش ياساق اولموش و بو ديله ميليونلار اينسان دانيشر امما يازيب پوزماغا، آراشديرماغا‌فورصت اولمايبدير. اخير ايللرده ديل عاليملری چاليشير بو ديلين استروکتورلارين آراشديريب و او ديله اثر يارادسينلار. بو بير گوزل فورصتدير. بو ديل آذربايجان تورکجه‌سی ، بويوک شاعرلر، تاريخچيلر، شعير و ادبيات خاديملری يارادميش، که کلوبال اولاراق دونيا تاريخينده، اوز ايزلرين بوراخيب‌لار.        
من کيمم؟ بو دونيادان مقصديم نه‌دير؟ مينلر کيلومتر مسافت‌ده اوز آنا يوردمدان اوزاق اولورسام، منيم دوغما يئريم تبريز،آذربايجاندير. من آذربايجان تورپاقلاريندا ديل آچيب و اونون گوز‌ه‌ل يام ياشيل داغلاريندا، روح آچان مئشه‌لرينده بوی آتميشام، منيم بابالاريمدا اوز بابالاريندان بيزه ناغيلار سويلرديلر. تبريزين حاماملاری ، باغلاری ، يئمکلری ،ميوه باغلاری ،چاليشان اينسانلاری ،آچيق سوفره لری داها ديللرده قاليبدير.

اينسانين کيمليکی ، وارليغی ، و هوييتی ، اونون کاراکتری البته کی اونون آنا ديلی ،اونون ايستک لريند‌ه ن و دوشونجه‌لريند‌‌ه ن باغليدی . ب.ام.ت. يا بيرلشميش ميللتلرين گلوبال ياسالاری و چارترلاری منيم آذربايجان تورک ديليمی رسميتله تانييب، بونا گوره بوتون دونيادا ايندی آذربايجانليلار چاليشير اوز تاريخی کاراکترين، اوز لوکال وارليغين و مدنيييتين يئنی ده‌ن معنا ائديب و دونيايه تانيدديرسينلار.

من بير آذربايجانلی اينسانام،آنتروپولوژی علمی پرنسيپ لرينه گوره، بو ميللت بير قديم و چوخ ماجرالی بير خالق اولوب . تمدن‌لر، ساواشلار، طبيعی تراژه ديلر و دسپوتيک رژيملرله قارشی قارشی اولوب. بو ئولکه ده‌ن او ئولکه‌يه، بو يوردان او يوردا، ييلاقدان قيشلاقا گئديب، داغلارين قوينوندا قالالار تيکيب و سسی سوداسی اينسان لار تمدونونده ياشيوب, وارليق چراغی يانيب، و بو گون، بو مقامه بو استقامته چاتيبدی .
من بير آذربايجانلی اينسانام، اوز ديليمه يازيب پوزماخ ياساق اولاندان، ياد ديللرين اويره نيب، حياتيمی دوام ائتميشم. منيم اوشاق اولارکن آغاش گزديرمه‌گيم، بايرام چاغی يومورتا دويوشدرومک لريم، تبريزين قهوه خانا لاريندا تيرنا وئرماخلاريم، کندلريميزده رنگلی گوللی پالتار گئيب شال ساللاما لاريم ايندی ده اوره‌گيمده دير. ناققيشلی ، توپ عره‌بی ، ماريا سالما،مادنقا، پيل دسته، چيله چيله، جيزيق اويناما، يومورتا دويوشدورمه ، دونبالان پيسداگيزلين پانج اويناما، هاميسی منيم اوشاخليقيمدان يادگاردير. تبريزين محله اوشاخلاری بو سوزلری هر بير زامان اوجا سسله اوخويورديلر:

اوشودوم ها اوشودوم،     
داغدان آلما داشيديم          
آلماجيغيمی آلديلار،        
منه ظولوم سالديلار،       
من ظولومدن بئزار‌ه‌م،     
درين قويو قازارم.

والله ايندی ياريم قرينه (اللی ايل) او تاريخدن سونرا، گئنه دئيره‌م ،من ظولومدن بئزاره‌م.

سهنديم ساوالانيم تاريخلردن يادگاردير. منيم آديم حميد، سوياديم داديزاده دير. منيم بويوک آناما، دادی رحمتليک ديه رديلر. بو سوياد و سجيلی اوندان يادگاردير.او بويوک آنا چوخ زحمتله چاليشاردی ، کيلومترلر يول کئديب چاليشاردی چاليشماخ و اوز اياغی اوسته دورماق بو آذربايجان عائله سينده بير قايدا اولدی . من تاسفله اوز دوغما آنامی اوشاق ايکن الدن وئرديم . سونرا چاليشماق منه حيات و کاراکتر اولدی ، ان چوجوق زامانلاريندان داغچی ليغی سئچيب و عزيز سانديم. منه آتا بابالاريم کيمی داغلار بويوک بير داياغ اولدو.آجی چای ، تبريزين چوخ قديم ايلله ريندن نشانه سی ، بيزيم اوزماق، گزمه‌ک و دولانماق يئری اولدو.آجی چای ، دورت داشلار،کهليک بولاغی ، امام آغاجی ، دندداغی ، پلنگ دره سی ، پکه چين، امام آغاجی . اينالی داغی ، ايلان اوچان دره سی ، ميشو داغی ، گوی زنگی ، دند، ، سوگوددو، سولطان سنجر،سامبران،سهندا وا ماحالی ، اوجا ساوالان داغی منيم چوخ ياخين دوستلاريم اولوب،اوره گيمه مرحم،گوزلريمه ايشيق، و ديزلرمه قوت اولوب            .
هر بير زامان ، بو داغلار اوز سينه لرين منه آچدی خوش گلدين دئدی . اوستاد شهريار، آذربايجانين کورکملی شاعری ، حيدر بابادا دئميشکن:      

من سنين تک داغا سالديم نفسين . سنده قايتار چوللره سال بو سسی .

۰بو داغلار منيم سسيمه سس وئريبب . من بو داغلاردا بوی آتديم بويودوم، دوستلاريملا بو داغلاردا گوروشدوم ، هر زامان بو داغلار منه محبت، دوزوم، عشق و مقاومت روحون وئردی . منيم کيمليکيمين بير حيصه سی بو داغلاردا فورمالاشيبدی . آذربايجان خالقينه، بوتون تاريخ بويو داغلار الهام چشمه سی ، حيات قايناقی ، ياشايش منيعی اولدو. بو داغلاردا هارمونيک حسسلر، وحدت روحی و بير متافيزيک قووه احساس اولور. من بو ائلين بير عضويه‌م آذربايجان ائلينين، اونون اوجا داغلاری ، دئديگيم کيمی ، قارلی ذيروه لری ، تکه دوندوران بولاغلاری ، گوز ياشی کيمی چايلاری هر بير زامان منه دوزگون يولداش و سير داش اولوبدی . بو ائل بو گون دونيا ساحه سينده داغيلميش و هر بير صحيفه ده منيم باجيلاريم و قارداشلاريمين سسی گلير. بو دونيا بير کيچيک گلوبال کند اولاراق آذربايجان ائلی بو کندده بير عضو اولماليدير. منيم ديليم، سوزوم، تاريخيم کيمليکيم باشقا ميللتلره ترجمان اولماليدير. بو حياتدان مقصديم نه دير؟ ايرانين هر بير طرفينده منيم باجی قارداشلاريم ياشير، اور‌ه کلری محيتله دولو.
منيم کيمليکيمين بير حيصه سی بيزيم غنی زنگين موسيقيميزده گورسه نير. ايللر بويو آذربايجاندا بيزيم ديل کولتور و يازيلی ادبياتيميز ياساق و ممنوع اولاراق، بو بويوک ميللتين سسين، سوزون، آمال و آرزيلارين سازلارين تئللرينده آوازه، خوانلارين سسلرينده ترنم اولوب ودونيايه بيلديريليب. طالعيمه باخ، اوز ديليم اولا اولا، باشقا ديللری اورگنديم، دوردوم، دايانديم، بو بويوک ميللتين صبری حوصله سی تاريخ بويو منه درسلر وئردی . چاليش، اويره‌ن، دونيا ايله، دونيانين بو گونکی ياشايشيله برابر و ايره لی گئت، بونا گوره ده بو گون بو بويوک ميللت صبير، دوزوم نتيجه سينده ايللر بويو مقاومتلردن سونرا اوز طالعينه،اوز ديلينه صاحيب چيخماق ايستيور، بو يولدا اينسانلاراصولح و با شقا ميللتلرله همکارليق ائتماخ ايستيور.

منيم آنا بابالاريم هئچ بير زامان پاسيو اولمادی ، ظلمه باش ايمه دی ، بو بويوک ميللت بو گون ميللی رنسانسين بابک قالاسيندا دونيايه اعلام ائدير، بو ميللت اوزو اوزونه قايدير. اوزو اوز چراغين يانديرماق ايستيور، اوزو اوزونو اوز ديليله اوز سوزويله تعريف ائتماق ايستيور . بو يولو ائل گوجيله سيل گوجيله آرام، آيق، دوشونجه لی به ينله گئدير. اوغورلار اولسون سيزه آی بويوک ميللت، آی شيخ محممدخيابانيلار، ستارخانلار، صفر خانلار بالالاری .

من کيمم، من بير بويوک کوتله نين کيچيک بير بالاسيام. فلسطين خالقينين شاعری نزار قپانی دئيرکن ﴿ريشه لريم درينليق لار دادير﴾. بيرتبريزلی اولارکن اوزومو دونيا عائله سينده بير عضو گورورم ايله اونا گوره ده بو گون ائليمدن اوزاق ياشيارکن، قيزيل دريلرله علاقه ساخليرام. بو اسکی يازيق و تاپدالانميش ائل.

طالعيمه باخ، ايللر يويو معلليم اولدوم، ميانداب، اردبيل، واسميش و تبريز شهرينده مکتبلرده درس دئديم. امما اوز ديليم اولا اولا باشقا ديلده زورلا پداگوژيا گيرديم .ايندی بو شهرده ترجمه چی اولارکن، اوز کوکومون اوستونده قالميشام. بو کوک بو ريشه منه حرارت، انرژی ، حيات وئرير. منيم آتا بابا کوکلريمده عشق، محبت، ائلی سئوماخ، ميراث کيمی اولوب .ياشماق يارادماقدی ديرکن، يارادماغا چاليشيرام، اوز کوکو اوستومده ياشاماغا چاليشيرام، بودور بير آذربايجانلی نين حيات فلسفه سی ، باخيشی ، دوروشی .

من، عاشيقلار دئميشکن ده ده ن بيک ليگه چاتماميشم، اونا گوره ده ائليمين قدرين بيليره‌م . تاريخ بويی چتينليکله‌ر، ووروشماخلار، هجمه لر، و آجليقلار گوروب و يا تجربه ائديب ، اونا گوره باريشين، صولحون، طبيعتين يام ياشيل مئشه لرين و چيچکله بورونموش سينه لرين احتراملا ايناملا قارشيليوره م. منه داغ گئچيسی ‌ده دئيرلر، ايللر بويو آذربايجان بالالارينا درس دئديم و اونلارين شرف و وقاريندان چوخ اويره نميشم.. ايله بونا گوره ده داغچيليق منه بير حيات ، بير عومور بويو ايش اولدی . من افتخارلا اوزومی بير آذربايجان بالاسی آدلانديريب و دونيا عائله سينده ببر عضوه م.           
سوروشورسونوز من هاراليم،نيه بوگون غوربت ائلدی ‌يم؟ يوزلرجه تکرار دئمه ليم، من اودلار يوردونون بالاسيام . بو حياتين يولوندا بير موسافيره م، دئميه سوزوم، دانيشماغا ديليم وار. من اوزوم اوزومه باغليام، ديليمه باغليام، سوزومه سودامه باغليام. بو نا کوره ده تيکانلی سيملری رسرحدلرده سينيرلاردا الی تفنگلی سينير قوروقچولاری رسميته تانيميرام، من ده بيراينسانام ديگر اينسانلارلا برابر حقوق. نئجه کی يوزلر آذربايجان شاعيری ، يازيجيسی ، عاليمی تکرار سويله يبله :

"آی اينسانلار صولحه گلين يوخسا دونيا محو اولار"   
"هر يئرده کی صولح اولسا او يئرده ن ضرر اولماز" 
"آزاده ليگی صولحی بيزيم يئرده سئوی للر" 
بونا گوره ده دونيانين بويوک فيلانتروپيستلرينه اوره کدن محبت و احتراميم وار، بويله کاراکترلر دونيا وارکن اينسانلارين ديللرينده ازبر اولاجاقدی ، صابر هوپ هوپ نامه سينله، شبسترلی معجز شعرلريله، آذربايجانين بويوک عاليمی جليلا محمد قليزاده ، و نلسن ماندلا و باشقا اينسان سوه ر و اومانيست اينسانلار. آذربايجان ميللتی ده بو کيمليگی بو گون آختاريب تاپيب و اونی دوشونوب واونا گوره ده يوز مينلرله هر ايل بابک قالاسينه يول چکيرله ر. بو کيمليکدن بير نشانه دير،کددير. اينسان اوزوزنه قايدماق، اوز کوکونه، اوز وارليغينا دوشونماغی ، عاليملر آراسيندا رنسانس آد قويولوبدی . منيم کيمليگيم ده بو کانتئکست ده معنا تاپير، اوزون گوستئرير، تئز يا گئج هر اينسان بو ريشه يه قايدماليدير، بوردا آرامش، درينليک، دوشونجه، سومه ک سويلمه ک و اينسانليق لبه لنير، آخير. بوردا هارمونی وار. دوغروداندا بو حيات بير سيرانگاهدير.هر اينسان بير ميسيوم صاحبی . بوردا آذربايجانلی اينسان اوز کوکو اوسته دوروب، اوز تاريخی موقعيتيندن، تاريخی ذيروه سيندن دونيايه باخير، سير ائدير و اونی دوشونور و معنا ائدير. بوردا هر اينسان اونا دوستدور، قارداشدير و هئچ بير اينسان ياد دگيل، بويله دير بير آذربايجانلينين حيات فلسفه سی .
دوغروداندا من کيمم، هاردا دورموشام، دوراقيم نه دير، دوروموم نئجه دير، و بو حياتی نئجه دوشونوره م گوروره م.دوغروداندا بو نه يوک دير منيم بئليمده منيم چيکنيمده و بو يوکو هارا قالديرماليام؟ من بو يوکو هر بير زامان هر بير ساعات هر بير دقيقه بوينومدا حس ائديره م، گاهدان منی يورور،گاهدان نفسدن سالير، گاهدان باشيمی آغريدير، گاهدان منی اوزون اوزون سودايه دالير، درين درين يوخولارا آپارير، دوشونجه لره يول وئرير. چيکنيمده بو يوکوم منه يول گوسترير، حياتين چالا چوققورلاريندا منه يارديمجی اولور، انرجی و آييقليق وئرير،اينسانلاری اينسان کيمی گورمکی منه اورگدير، منی يولا چاغيرير،منی حرکته گيترير، گاهدان منی اوجا ذيروهلر،قايالارا سيلديريم داشلارا قالديرير،گاهداندا منی سيخ اورمانلاردا سيره آپارير. بو يوک، بو دويغو، بو کوکو آنماخ منی عشقه ساری چاغيرير.اونا گوره ده بو يوک منه چوخ حرمتليدير. بو يوک منی چايلاردان گئچيردير، منه بوتون اينسانلاری دوست کيمی چاغيرير، منه سوزون مقامين آيدينجا گوسترير، نه گوزه ل يوک، نه ماراقلی فلسفه دير.
بو يوک منه آذربايجانين تاريخيندن دئير، آنا بابالاريمين يوللارين ايشيقلادير، بيردن منی بابکين بذ قالاسينا قالديرير، بيرزامان چنلی بئلده کوراوغلينين دليلريله منی دلی ائدير، بير زامان دا نبی دن منه داستانلار سويله يير، نگار، هجری قازاماتلاری دلمکه چاغيرير. نئجه دئيم بو يوک منه ائل اوبادان سس وئرير، خبر گتيرير، منی بو گونکو دونيانين ملزمه لريله اويغون ائدير.
بو يوک، يوخاريدا دئديگيم کيمليک، بو سورغو سورو، مولانا رومی دئيرکن، اينسانی گيزلی زنجيرلری قيرماغا آپارير، فضولی کيمی بدنی پنبه داغ ائدير و جنون زنجبرينين طوقين بوينوما سالير. دونيايه پلان وئرمه دن اونجه اوزومو پلانناشديرماليم.
بو يوک، بو سودا، بو سورو، منی يئنی افقلره آپارير، يئنی يوکسکليکله قالديرير، چشيتلی استقامتلری آيدينلاشديرير، منی اوز اوزليگيما قايتارير، منی اوز کيليميمجه قيچيمی اوزادماقا چاغيرير. منه بير بويوک تصوير کله جکدن و چوخ اينجه شفاف دورو تصوير گئچميشيمدن گوسترير، منه هايليور کی : آی کيشی ،ياواش.اوزوی دوشون. ايله بير کی دونه نيدی تبريززده، اهراب محله سنده، ملا علی اکبر کوچه سنيده اقا بويوک آقانين اوغلينن عاشيق اوينيوردون،سينکا سوروردون، چيله چيله بورنوا چيله،گرده کان، بالا گول، گيزلن پانج، مادنگا، توپ عربی ،ناققيشلی ، مارا توتدو اوينيوردون. يا اياق يالين گونون ايستيسينده لاله کندينده کئديرديم ،نه دئيم. منه تبريزيمی بوی آتديغيم کوچه لری کوسترير، منيم ديليمين يالقيز صاحبسيز قالماسين گوسترير. بو يوک منی بو سورقو سورويه چکير کی من اينسانلارا اوز ديللرينده قولاغ آسيم، و فارسجا دئسم :"عزيز انسانلار با من با زبان خودم سخن بگوييد." هاردان گليب هارا چاتميشام، هانکی ايستاسيونلاری گئچميشم، بو دونيا سفرينده هانسی مرحله لرده‌ن رد اولموشام، بونلارين هاميسی گوزومون اونونده ايشيقلانير، منيم روحوما صفا و اوره گيمه انرژی وئرير، بو يوک من بير آذرباججانلی اولاراق مندن وار،او زاماندان کی اوز ديليمی اوز دوغما يئريمده يالقيز صاحيبسيز گوردوم، او زاماندان کی منيله اوز ديليمله دانشماديلار، او زاماندان کی بير معلليم اولاراق آذربايجان تورک بالالارينا قورخا_ قورخا، چکينه _چکينه آذربايجان ديلينده درس دئديم، بو يوک ايله جه منيم بوينومدادير. آغير داغ کولاسی کيمی هر بير زامان بو يوکی داشيماخديم . بو يوکو داها چکنلر اولوب. بو يوکو چکمک ده منه چوخلاری يارديم ائديب، بو يوکو تک باشا چکمک اولارمی ؟ بو يوکون آلتيندا چوخلاری قالدی ، جانيندا وئردی ، اياخدان دوشدو. بو يوک چوخلارين سورگونلره آتدی ، بو يوک چوخ دوستلاريمی اياقدان سالدی . وا للاه مشسنی دئيره‌م . گوزومون اونونده دير: مشسن (مش حسن) سويله ير: "آی حميد من بو فيزيک درسين اوز تورکی ديليمده راحات اورگه ديره م". اونون سوزلريندن بيری بودور، " دولان داغ داشلاری مشسن، قوی سنی ديوانه بيلسنلر". بو يوکده‌ن نه قدر دئسم آز دئميشم، بو يوک بو گون منی کانادا دا ونکوور شهرينده ديری ساخلايير. بو يوکو چکمک منی حيرتلره سالير، هر نه زامان گئچير يوکون آغيرليقين حس ائديره‌م . دوغروداندا محممد فضولی ، عمادالدين نسيمی نه چکميشلر، اينسان اوز مقامين دوشونورسه، ياشايشدان ، ديريليکدان آماجی آنديقجا، و حياتين معناسين و مقصدين آنلاديقجا، داها دوغروسو زامان زامان درين فيکيرلرده جومور و اينسانی اسنسان ائده‌ن، يعنی سوزون، ديلين، کلمه نين قدر قيمتين آنلايير.

بو يوکون آغيرليگيله هله يورولماميشام، يورولسامدا هله بو يولدا نفس وار يول گئدمکه و يئر وار دوشونمه که. هله ده سينه ده عشق و اوره کده حيات لبه له نير. هله بو يولون مسافيرلری تازا نفسله يولا دوشوبله،بو يولون سونو يوخ،بو يول اينسانلارين ابدييت يولودور،وارليق يولودور،بو يولدا ئولوم يوخ،هر نه وار وارليقدی ، عشقدی ، صفادی ،محبتدير، ايسترسن بو يولی داها درين آنلاياسان، گور عمادالدين نسيمی نئجه کگئده‌رميش.
اولور کی سنه بو يولدا ديوانه آد وئرسينله، اولسون، بودا حياتين بير پارچاسيدير، بير مرحله سيدير. بير آذربايجانلی نين حيات فلسفه سيدير. هر نه قده ر دونيانی دولانسان، يئنه اوز اصليوه، اوز دوغما يوردوا قايتماليسان.او سنون بوينوندا بير يوک دور، او يوکو يئيرنه يئتيرماق لازيم،من هر بير زامان کی بو سير و سودايه دوشونوره م، داها آرتيق اينسان حقلرينه و بشريته عشق، محبت بسله مکی آنليوره‌م. بير آذربايجانلی اولاراق دونيانين دئيشمه سين، زامانين عوض اولماسين، و دورون دگيشمه سين گوروب، داها چوخ اوزومو باشقا اينسانلارلا ياخين گورورم. ايران آذربايجانيندا، تيريز شهرينده اولدوم، ديليمی کسديلر، فارس ديلی فورمال ديل اولدی .، امما من بو ديلی اويرنديم، بو ديله دانيشانلارا نيفرت بسله مه ديم ، بونا واقف اولدوم کی اينسانلار آراسيندا، ديللر آراسيندا دوشونجه‌لر وار، همکلارليقلار وار،، بونو ديلچيليقدا آنلاديم و اوز اويره‌ن چيلريمه ده دئديم کی بير زامان اولا بيله‌رکی ديلدن بير چماق کيمی استفاده اولسون، نئجه کی بو گون انگليسی ديلی ، يوزلر تحقيقاتا گوره، باشقا ديللری تهلوکه ده ساخلاير، امما من آذربايجانلی اولاراق، ديليم پارچا پارچا کسيلدی ، مدنييتيم دوغراندی ، امما من يوکو بوراخماديم، دوردوم، آغزيم دولو قانلا، گوزوم دولو توسسيله، باخديم، دزدوم، دئديم بو بويله قالماز، و سوزوم دوز اولدو، اويله قالمادی ، آذربايجان خالقی ايراندا رنسانس ياپدی ، تک تک آندی ، دوشوندو، يولا دوشدو، بو دفعه بابک آتا اولدو، ستارخان هرايه گلدی ، دوکتور زهتابی نين نين ديل ساحه ده سوزلری اينسانلارا تکرار اوخوندو، يازديغی اثرلر يايلدی . سونرا صفرخان ديللرين ازبری اولدو، اوستاد شهريارين حيدر باباسی سينه‌لرده حک اولدو. بهرنگی ديريلدی ، دکتر براهنی کيمی گورکملی ضياليلار آذربايجانلی اوغلو دونيا ساحه سينده تانيندی و بو يوک گئنه ده باشقالاريله ايره لی يورودو. بو گون اينسانلارين و باشقا ازيلميش ميللتلرين اويانيش زامانيدير. من اونا رنسانس دئيره م، رنسانس يا تکرار يوخودان دوروب، يئنيدن اوز اوزونه دونماخ . دونيا عرصه سينده بو گون آپريلين ۲۰ سی ،۲۰۰۳ نجی ايل . دونيا ساحه سينده بو رنسانسی گورمک اولار، کوردلر، عربلر، پشتونلار، افغانلار، اوزبکلر، قره چيلر، توتسيلر هوتيلر ، و بوتون دونيانين اونودولموش قوملاری ، ميللتلری ، صلحه دوغرو يول گئديرلر. اوز سسلرين سوزلريله، موسيقی الحانلاريله، دونيايه بيلديريب و آزادليق پروچئسی گئچيرديللر. منده بير آذربايجانلی اينسان کيمی بو قافيليه قاتيلميشام، بو گون بو سس بو سودا داها يوکسه لير، بيزده بو چشمه يه قوشولمالی و مارکيميزی ، نيشانه ميزی بير ميللييت کيمی ،آذربايجانلی اينسان کيمی بوراخماليوخ. ايراندا بو حاقلاريده باشقا ميللتلره ده تانيدديرماليوخ .

برگشت به بيوگرافی