دائرةالمعارف شهر تبريز

www.tabrizinfo.com

 

 

 

 

 

 

      نام و نام خانوادگی:

حميد داديزاده تبريزی

      سال ومحل تولد:

1327 شمسی تبريز

      محل سکونت فعلی:

کانادا

      عرصه فعاليت:

زبانشاسی

      امکان ارتباط:

hamid.d@shaw.ca

 

 

 

 

 

 

صفرخانين حيات سفري


صفر قهرمانيان بير اينسان عؤمرونو حبسخانا‌دا قالاندان سونرا بو دونيادان کؤچدو. ميللتلرين تاريخينده و اونلارين درين کولتور و معنوی حياتلاريندا بير نيشانه‌لر، کودلار وار، کی تاريخ بويو ديللرده ازبر اولوب ابدی قالاجاقدير. زامانين گئچمه سی و دؤورانين دييشمه سی بو نيشانه لری ميللتلرين تاريخی صحيفه لريندن سيله بيلمز. هر ميللتين کيملييی ، وارليغی ، هووييتی و کاراکتئرلرين بو نيشانه لرله تانيماق دا اولا بيلر. صفر بو سيرادا آذربايجان تاريخيميزده بير نيشانه دير.

صفر خان ايران آذربايجانين بير بؤيوک قهرمان اوغلو اولاراق، گنج ايکن ظولمکار اربابلار و فئودال لارلا موباريزه يه باشلادی. صفر خان آذربايجان خالقىنين نيشانه سی اولاراق، ميللتيميزين ديلين، شرفين، وارليغين و تاريخين ۳۲ ايل شاه رئژيمينين حبسخانا لاريندا قورويوب ساخلادی. او بير بايراق کيمی هر بير زامان هاوالانيب، دايانيقلی، قودرتلی و محببتلی بير اينسان کيمی مينلر آزادليق يولون گئدنلره بايراقدار اولدو. صفرخانين آدی آذربايجان تاريخی، کولتورو و مدنييتينده بابک، ستارخان، خيابانی و باشقالاری کيمی حک اولونوب ياشاياجاقدير.

صفرخان بير آيکان کيمی ميللتيميزين سسين، آرزولارين و اونون ظولمه قارشی موجاديله ايدئالارين ترننوم ائدير. ۳۲ ايل سورگونلر، ايشکنجه لر دوستاقلاردان سونرا، صفرخان تئهرانين ائوين حبسخانا سيندان آزاد اولاندان سونرا، دوستلاريميزين چييينلری اوستونده چوخ حؤرمتله قارشيلاندی.

اونون سئويملی آذری ديلی، اينسان کاراکتئرلری، متانت و دؤزومو افسانه لرده قئيد اولماليدير. صفرخانين عؤمور سفری و حيات يوللاری بوتون ظولم آلتيندا قالان مولتی کالچير (نئچه مدنييتلی) اؤلکه لرده بير سمبول اولا بيللر. تاسسوفله صفرخان بير دئسپوتيک نيظامدان قورتولارکن باشقا بير اينسان تاپدالايان رئژيمله اوز اوزه اولدو.

صفرخانين ايدئالارين آذربايجانين گله‌جک نسيللری ديرله نديره جک . اونون سسی و مئهريبان باخيشی ائليميزه سئوينج و ايلهام وئرير . موعاصير شاعيريميز نه گؤزه‌ل بو ايدئالاری سؤيله ميشدير:

کاش کدر آلمايا يئر کوره‌سينی   
اينسانلار غوصصه‌يه دولمايا بئله
 
هامی سئوگی دئييب سئوگی ائشيده

داغلی بير اوره‌ک ده اولمايا بئله
   
هر باخيش هر دوداق هر ديل هر آغيز
       
پايينی سئوينجله داشييا بيله.......
 
(عليرضا ميانالی)


آذربايجانين ضيياليلاری و باشقا عدالت پرور و صولح سئون وطنداشلاريميز اونون تورپاغا تاپشيرما مراسيمينده ايشتيراک ائديب و حاضير اولدولار. يوزلرجه توپلانتی، چيخيش و مجليس بو ايلهام وئره‌ن اينسانين حاققيندا تشکيل وئريلدی و يازيلار يازيلدی. سؤزومون سونوندا بونا اشاره ائديم کی صفرخان حاققيندا لازيم اولان تديبرلر و اونا لاييق خيدمتلر عمله گلمه‌دی. يالانچی ايرانچيلار واقتی غنيمت بيليب ، صفرخانی وفات ائدندن سونرا دا راحات بوراخماييب، اونا تؤهمت وورورلار
      
هر حالدا، سعادت و آزادليق اولدوزو وطنيميزده دوغان زامان صفرخانين آدی و اونون کاريسماتيک کاراکتئری داها ديللره دوشوب و ائللر ايچينده ياييلاجاق.
        
روحو شاد و آدی ابدی قالسين.
       

 

برگشت به بيوگرافی